نصابون فى اغلب المناسبات و مرتشون فى كل الاحوال

مش رجال الاعمال و لا المسئولين  .. انهم ألافارقة الاوغاد … الحكاية و مافيها ان شبكة راديو و تليفيزيون العرب محتكرة ماتشات تصفيات كاس العالم لقارة افريقيا  بس البلد المستضيفة للماتش لها حق انها تذيعه على قنواتها المحلية الارضية و بس ..لكن الفهلوة المصرية وصلت لفكرة خطيرة انها تبعت ارسال الماتش اللى على ارضها للكونجو و فى المقابل الكونجو تبعت الماتش اللى على ارضها لمصر عشان تذيعه على قناتها الارضية اللى هى القناة الاولى بتاعتنا .. اتمضى الكلام ده من سفراء مصر و الكونجو و فعلا بعتت مصر ارسال الماتش اللى فى القاهرة للكونجو و الناس هناك اتفرجت و زقطت ببلاش

جه بقى ماتش العودة اللى فى الكونجو و لبس الاستاذ /عصام عبدالمنعم البدلة و اتشيك و راح الاستوديو التحليلى بتاع القناة الاولى و اتكلم شوية عل الهوا و فضل مستنى الارسال من الكونجو  حسب الاتفاقية الفهلوية بس مفيش حاجة جات و ساعتها حس عصام انه لبس العمة هو و الفهلوية اصحابه و من ميين من الافارقة كمان ..

بس عصام , رئيس رابطة النقاد العرب و الرئيس السابق لاتحاد الكرة و عضو اللجنة المكلفة بدراسة فشل بكين و الناقد الرياضي بالاهرام ,مسكتش و كتب مقال لو كتبه فى بلد فيها قانون كان زمانه اتسجن او على اقل تقدير اتفصل . الاستاذ الكريم قال حرفيا “اغلبية دول القارة السوداء لا يمكن الوثوق بكلمتها و اتفاقاتها “و  “انهم نصابون فى اغلب المناسبات و مرتشون فى كل الاحوال“

انا مش من انصار الوحدة الافريقية او من اتباع الاخ العقيد معمر القذافى شفاه الله و عفاه لكن انا مضايقنى انه جه  على ماتش ماتذعش و ساعة ضاعت من وقته الغالى و عمل فيها اسد لكن لما 50 مصرى يموتوا فى ثانية او 1300 مصري يغرقوا ما عرفش يقول ربع الكلام التقيل ده  و لو حتي من بعيد ماحولش يلمح حتى ..لكن ماشاء الله عليه و على حزمه و قوة قلمه لما الكلام جه عل الافارقة ..لا ماعندوش تفاهم يعنى ماقلش مثلا الاقلية و لا القلة المنحرفة فى افريقيا ده عمم !! الكلام عل الاغلبية و الشتيمة صريحة لا قلب جرئ فعلا ..طبعا لانه معندوش حاجة يخاف عليها من الافارقة الغلابة ..النصابون فى اغلب المناسبات و المرتشون فى كل الاحوال مش الافارقة يا عص. دول امثالك  ..  .

صورة المقال جوه